摄影/日升
张园现在是网红地，交关人去白相，里向有上海经典石库门房子，一眼阿姨妈妈侪去拍照片，交关阿姨还穿仔旗袍拗造型。每趟看到朋友圈里有人晒出辣张园拍的照片，我就会想起过去三十几年住辣“张园”的日脚，就会想去走一走。 对我来讲，张园的一砖一石、木制窗户、黑色大门，侪特别亲切，勿过当时阿拉搿点住辣里向的人家侪是从后面小门进出的，小门进去就是灶披间，五六家人家侪辣搿搭烧饭。 当年我住的是亭子间，楼下客堂间里住的是胡家伯伯搭仔胡家姆妈，两家头侪是热心人。胡家伯伯是宁波人，欢喜听京戏，屋里一只半导体一日到夜放京戏，伊就跟仔哼唱。礼拜天孙女来看伊，他领仔孙女到弄堂里白相，嘴巴里仍旧要哼两句京戏。乃末胡家姆妈总要叮嘱一句：老头子！小人领好，走路覅唱了！ 两楼两间朝南的大房间是搿幢房子里最好的房间，分别属于二兄弟。阿哥是三口之家，夫妻俩带一个女儿。阿弟是四口之家，除脱夫妻两家头，还有一个儿子、一个女儿。 楼下灶披间旁边有一个小天井，天井里有一只水斗，本来只有一只水龙头，后来住的人家多了，轮流用水勿便当，水费也勿好分摊，索性每家每户侪装一只水龙头，再后来还有人家辣大水斗旁边装了一只小水斗，记忆里水斗边浪永远有人汏物事。 “张园”阿拉老早还叫伊“张家花园”，交关电影侪来搿搭取景，每次有电影演员来拍戏，阿拉搿点小朋友就激动得勿得了。 后来听说搿搭要动迁了，住辣搿搭的老老小小侪邪气开心，毕竟大家侪想住进煤卫齐全、独门独户的新房子。勿过，当真要动迁了，交关人家又不肯走了，理由各种各样。特别是一眼老年人不舍得走，拖一天是一天。当然，最后大家还是侪搬出去了。再后来，搿搭就被封闭起来了，一封就是好几年。我每趟去“王家沙”买糕点，总归要弯进去看看，可惜看勿见啥物事。有一天，我辣朋友圈里看到有老邻居讲张园终于开放了，里向还开了勿少商店，邪气时尚，顿时就有了去走一走看一看的冲动。 重新走辣弄堂里，既熟悉又陌生，熟悉的是一砖一瓦，好像真的回到了原来的时光，陌生的是，少了原来人声嘈杂的烟火气。我边走边看，特别留意身边走过的游人，假使能碰着一个老邻居，肯定会特别开心。 责任编辑：日升 (责任编辑：日升) |
