讲讲老早的杆秤
来源:新民晚报 作者:钱红春 时间:2023-06-25 点击:
摄影/赵杉
我搭老伴常常回忆儿子的小辰光，前几日又讲到伊辣我爷娘屋里白相杆秤的事体。
上个世纪七十年代，儿子四岁多，有趟我带伊去爷娘屋里白相。一进门，儿子就看到挂辣厨房间墙壁浪的杆秤，偷偷交拿到手就奔出门，拿秤杆当枪瞄东瞄西，又当剑舞上舞下，推板一眼戳到邻居小囡的面孔，爷娘吓出一身汗。后来再去，爷娘做的第一桩事体就是拿秤囥起来。
埃辰光的秤侪是杆秤，是生活当中的常用衡器。杆秤的结构交关简单，由秤杆、秤砣、秤纽、秤钩或秤盘组成，秤杆浪有显示斤两的秤星。为防止磨损，秤杆两头还有金属护圈。过去的杆秤一市斤有十六两，后来一市斤改为十两。杆秤有大有小，小的可以精确到毫，一个人就好操作。大的可以称几百斤，要二三个人才能完成。
记得小辰光弄堂边浪有家专门做杆秤的作坊，里里外外就老板一个人。作坊的墙浪挂满大大小小的杆秤。我每趟走过，总看见老板拿把木钻，对牢秤杆钻洞。据伊讲，一把可以称三十斤的杆秤，要钻三百多只洞。等洞钻好，就拿根铝丝插进去，插好一个，用刀割断，用刀背敲平。等全部完成，再用砂纸打磨，就成了显示斤两的秤星。我还听老板对买秤的人讲，做秤杆的木料必须是风干一两年的硬木，搿能一来，秤杆就勿容易开裂变形。因为木料的种类、分量、粗细、长短侪勿一样，伊店里的每把秤侪是勿一样的，需要根据实际情况定做。
当时的粮店、菜场、百货店侪是国营的，短斤缺两的事体勿大有。后来开放了集市贸易，个体商贩多了，就有摊贩动歪脑筋，辣秤砣、秤盘浪动手脚。特别是路边摆，因为呒没人管，经常短斤缺两。“买汏烧”们为了避免吃亏，只好自备杆秤。其实真正复称的并勿多，摊贩看见顾客带了杆秤，就勿大敢“做手脚”了。我爷娘屋里的杆秤就是埃歇辰光买的，从来呒没看伊拉用过。
由于杆秤很便宜，有些弄虚作假的摊贩就算被人捉牢，秤被拗断，还是勿当回事体。记得有一天我下班，看见路边有个小贩推仔脚踏车卖香蕉，价钱比店里便宜勿少，就挑仔一串。小贩用杆秤一称，随口就报分量，还讲秤杆翘得老高便宜我。我假装翻包，一边翻一边讲：“让我用弹簧秤称称看。”小贩一听心虚了，马上推仔脚踏车就溜。
现在衡器的品种越来越多，各种电子台秤、弹簧秤、天平秤，既精准又方便，杆秤被淘汰也就勿稀奇了。再讲现在提倡诚信经营，政府又严格监管，当年“买汏烧”们一手拎篮头，一手拿把杆秤去菜场的景象再也看勿到了。
责任编辑：日升