|
2022-06-12 来源：新民晚报网 作者：秦来来
文/秦来来
我小辰光住辣石库门弄堂里，楼浪亭子间里住了一位苏州好婆。侬覅看伊年纪老大了，照样交关注意自家个衣着容貌。搿天一早起来，苏州好婆用凝刨花水拿一头雪白个头发梳得卷光滴滑、纹丝勿乱。
凝刨花水，现在个青年人侪勿晓得是啥物事。阿拉小辰光看到个是，小商贩肩胛浪背一只长凳，像磨刀师傅一样嗰，勿过伊上头摆了一段用榆树加工过嗰、光光溜溜长方形木头，走街串巷，碰到有人要买个辰光，就用一把阔来兮个刨子轻轻一推，一片片薄薄嗰、像波浪形个凝刨花披下来就可以用了。用个前头先摆到热水里浸一浸、泡一泡，一歇歇辰光，就会渗出黏嗒嗒个液体；用个人用小毛刷子拿迭个凝刨花水挞了头发浪，勿过一歇，头发变得光可鉴人，外加可以梳理定型，而且还能散发出淡淡芬芳。比现在个啫喱水、喷发胶好得多。因为伊勿但具有润发、定型个功效，还是名副其实个天然绿色美发用品。
好婆身浪向穿一件士林布个大襟短衫，门襟浪向插一朵白兰花，幽香扑鼻，一眼也勿输拨现在个SK-2。好婆就像老上海个女人一样，低调、勿张扬，手里向拿一只绢头包，一块麻纱绢头四只角十字打搅，绢头包里一把房门钥匙，一眼零碎铜钿，再加几粒粽子糖，万一碰着小小囡，可以分分。一身打扮三青四绿、得体大方，手里拿包个感觉，实实比拿香奈儿、爱马士要吃价得多了！
我看见了，上去打招呼：“噢哟，好婆啊，今朝穿得介吃介，啥地方去呀？”
“望望我阿姐。”
“啊？望阿姐？”
“啥意思？我勿好望阿姐？”
“勿是，勿是。好婆，侬今年高寿？”“还小，98岁。”“98岁还小啊？”
“咦，有啥奇怪。我上头有阿姐，哪能好算大呢？”
“噢，对对。好婆，侬阿姐今年高寿？”
“102岁。”
“侬屋里倒侪是长命百岁？”
“长命百岁？啥稀奇。我姆妈活到仔120岁。”
“噢？！好婆，迭能看起来侬可以活到150岁。”
“150岁？”好婆听了笑起来，“150岁，长是长子点。不过，阎罗王勿来请我去，我总勿见得自家跳到黄浦江里去。侬讲阿对？”
好婆一面讲，一面开心笑起来；手里拿仔一只绢头包，回身袅发袅发走远了，去望伊阿姐去了，身后只留下来一串笑声……
责任编辑：日升
| 
发表于 2022-6-24 14:50:38
